Back

ⓘ Batutut iku sawijining makluk nyalawadi kanthi wujud arupa kethek gedhé. Wong-wong mitayani yèn makluk iki akèh ditemokaké ing Wewengkon Sabah, Malaysia, ing pu ..




                                     

ⓘ Batutut

Batutut iku sawijining makluk nyalawadi kanthi wujud arupa kethek gedhé. Wong-wong mitayani yèn makluk iki akèh ditemokaké ing Wewengkon Sabah, Malaysia, ing pulo Kalimantan pérangan lor.

Batutut anggoné mlaku ngadheg kaya manungsa, nganggo sikilé cacah loro, lan dipitaya minangka kéwan kang metu bengi. Batutut mangan kéyong kali kanthi mecah cangkangé mawa dikepruk watu, nanging wong uga mitayani yèn Batutut merjaya manungsa kanthi ndhèdhèl dhadhané manungsa saperlu dijupuk atiné. Batutut wedi karo geni.

Sawijining ahli zoologi saka Inggris, aran John MacKinnon nemokake rong atus tapak sikil ing Ulu Segama National Park utawa Taman Nasiyonal Ulu Segama ing taun 1969. Tapak sikil iki dipitaya minangka tapak sikile Batutut. Dawané udakara 15 sèntimèter, lan ambane 10 sèntimèter. Driji lan tungkaké mèmper kaya driji lan tungkak sikil manungsa, nanging tlapakané luwih cendhèk lan luwih amba saka tlapak sikilé manungsa lumrah. Jempolé ana ing pérangan sikil sing béda kaya manungsa kuwalikané posisi jempol ing manungsa.